ජපානයේ විවාහය කොයි වගේද…
ජපානයේදී තමාගේ සහකරැවා හෝ සහකාරිය සොයාගන්නා ආකාරය අනුව එනම්, යෝජනාවකට අනුව සහකරැ තෝරාගැනීම “ඔමිඅයි” ලෙසත් ආදර සම්බන්ධයකින් සහකරැ තෝරාගැනීම “රෙන්අයි” ලෙසත් හදුන්වනවා. අතීතයේදී ජපන් යුවතියන් තම සහකරැ තෝරාගැනීමේදී උස, අධ්‍යාපන මටිටම ඉහළ, ධනවත් තරැණයෙක් සොයා ගැනීමට උනන්දු වුවත් වර්තමානය වන විට ටම් තත්වය බොහෝදුරට වෙනස් වී සාමාන්‍ය කාර්යාලයීය සේවයේ නියුතු තරැණයින් සොයා ගැනීමට පෙළඹීමේ වැඩි ප්‍රවණතාවක් දක්නට ලැබෙනවා .
ජපානයේදී විවාහ උත්සව ෂින්තෝ සම්ප්‍රධායට අනුව හෝ කතෝලික පල්ලිය තුළ සිදුකරනවා. ෂින්තෝ සම්ප්‍රධායට අනුව සිදු කරන විවාහයකදී මනාලිය හා මනාලයා සාම්ප්‍රධායික කිමෝනාව අඳින අතර මනාලිය සුදු පැහැති හිස් පලඳනාවක් පළදිනු ලබනවා .මනාලියගේ කිමෝනාව සුදු හා රතු වර්ණ වලින් සමන්විතයි. කතෝලික පල්ලිය තුළ සිදු කරන විවාහ උත්සව බටහිර රටවල සිදු කරන උත්සව වලට බොහෝදුරට සමානයි.
තෝකියෝව වැනි නගරවල කාර්යබහුල ජීවිත ගත කරන තරැණ තරැණියන් අධ්‍යාපනය, රැකියාවේ ස්ථාවරත්වය ආදී කරැණු මූලික කර ගනිමින් විවාහය ප්‍රමාද කළත් නගරයෙන් ඈත පළාත් වලට වන්නට තරැණ තරැණියන් ඉක්මනින් තම විවාහය සිදුකරගැනීමට යොමු වේ. ලංකාව තුළද මෙම තත්වය බොහෝදුරට සමානතාවයක් දැකිය හැකි නොවේද? මෙලෙස ප්‍රමාද වී සිදු කරන විවාහ ජපන් බසින් බන්කොන් (Bankon) ලෙසින් හදුන්වනවා.
ජාත්‍යන්තර විවාහ…
එකම රටක් එකම ජාතියක් අතර සිදුවන විවාහ බහුල වුවත් වර්තමානය වන විට ගෝලියකරණය වූ ලෝකයක් තුළ වෙනත් රටවල් හා වෙනත් ජාතීන් සමඟ සිදු කරන සම්බන්ධතා පුළුල් වීම නිසා ජාත්‍යන්තර විවාහ සිදු කරගන්නා පිරිස වැඩි වී තිබෙනවා. විශේෂයෙන්ම අධ්‍යපනය හා රැකියා සඳහා විදෙස් ගත වූ විට හමුවන වෙනත් රටවල තරැණ තරැණියන් සමඟ ප්‍රේම සබඳතා ගොඩනගාගෙන විවාහය සිදු කර ගැනීම නිරන්තරයෙන් අසන්නට ලැබෙන දෙයක්. ජපානය තුළ වගේම ලංකාව තුළත් මෙම තත්වය දකින්න පුළුවන්. 
මොකක්ද මේ “දෙකිචත්තා කොන්” කියන්නෙ?
විවාහ වී නොමැති තරැණ යුවලකට දරැවන් ලැබීමෙන් පසුව හෝ ගර්භනී වීමෙන් පසුව විවාහ වීම ජපන් බසින් “දෙකිචත්තා කොන්” ලෙසින් හදුන්වනවා. අතීතයේදී
මෙවැනි තරැණ තරැණියන් දෙස සමාජය අප්‍රසාදයකින් යුතුව බැලුවද වර්තමානය වන විට මෙම තත්වය සාමාන්‍ය දෙයක් බවට පත් වී තිබෙනවා. බටහිර රටවලත් මෙවැනි සිදුවීම් දැකගත හැකි වුවත් ලංකාව තුළ නම් මෙවැනි අවස්ථා පිළිබඳව දැනගැනීමට ලැබී නැහැ.
ඉතින් ඔබේ අදහස මොකක්ද මෙ වගේ (දෙකිචත්තා කොන්) සංකල්පයක් අපිට ගැළපෙනවද? නැද්ද? සමාජය ඒ දිහා කොයි විදිහට බලයිද? හිතල බලන්න ඔබට භාරයි….
