ජපානයට යාමට සහ ජපානය කෙරෙහි උනන්දුවක් දක්වන බොහෝ දෙනක් නිතරම විමසන කරුණක් පිලිබදව මෙහිදී කතා කිරීමට බලාපොරොත්තු වෙනවා එනම් ජපන් භාෂාවෙන් arubaito ලෙස හදුන්වන part time jobs නැතහොත් අර්ධ කාලීන රැකියා පිලිබදව සරලව කෙටියෙන් කතා කිරීමට කැමතිය. 

රැකියාව කිරීමට ලැබෙන කාලය හා වැටුප

ජපානයේ විදේශ අධ්‍යාපනයට යන බොහෝ දෙනා නිතරම විමසිලිමත් වන කරුණක් නම් ජපානයේ part time කිරීමට ලැබෙන කාලය කොතරම්ද සතියකට කොපමණ වෙලාවක් රැකියාව කිරීමට අවස්ථාව ලැබෙනවාද යන්නයි.විදේශ ශිෂ්‍යයෙක්ට සතියට පැය 28ක කාලයක් රැකියාව කිරීමට හැකියව ලැබෙන අතර බොහෝ විට එය දවසට පැය 4 ක් ලෙස දැක්විය හැකිය.පැයකට ගෙවනු ලබන මුදල ප්‍රදේශයෙන් ප්‍රදේශයට වෙනස් කමක් දක්වන අතර එය tokyo ආශ්‍රිත ප්‍රදේශ වලනම් 900-1000 අතර අගයක් ගනු ලබන අතර ඕසකා වැනි ප්‍රදේශ වල 800-900 පමණ වේ. ෆුකෝකා වැනි ප්‍රදේශවල පැමිණෙන විට එම මුදල් ප්‍රමාණයේ තරමක් දුරට අඩු වීමක් දක්නට ලැබෙන අතර එය 750-800 අතර ප්‍රමාණයක් ගනී.ඔකිනවා වැනි ප්‍රදේශවලනම් 700-750 අතර වේ.

රැකියා අවස්ථා

කුමන වර්ගයේ රැකියා අවස්ථා ඇතිද යන්න අනෙක් ගැටළුවයි. බොහෝ විට ආපන ශාලා වල පිගන් සේදීම වැනි රැකියා ලැබෙන අතර නමුත් ජපන් භාෂාව හොදින් හැසිරවීමට හැකිනම් වේටර් වරයෙකු ලෙසද රැකියා කිරීමට අවස්ථාව ලැබේ. ජපානයේ බොහෝ දෙනා ක්ෂණිකව ආහාරයට ගන්නා බෙන්තෝ(lunch packet) ඇසුරුම් කිරීම සදහා වෙනම කර්මාන්ත ශාලා ඇති අතර ඒවායේ ඇසුරුම් ක්‍රියාවලියට බොහෝ විට විදේශ සිසුන් යොදා ගනී. එමෙන්ම රෙදි සෝදන කර්මාන්තශාලා(laundry) සදහාද විදේශික සිසුන් යොදා ගනී.  කර්මාන්තශාලා සදහා මෙන්ම  ජපන් භාෂාවේ ප්‍රවීණතාව අනුව සුපිරි වෙළදසැල් සහ පැය 24 ම ක්‍රියාත්මක වන කුඩා ප්‍රමාණයේ සුපිරි වෙළදසැල්(konbini) සදහාද විදේශ සිසුන්ට රැකියා අවස්ථා ඇති බව කිව යුතුය.ඉංග්‍රීසි(english)භෂාව හොදින් හැසිරවීමට හැකියාව ඇත්නම්  හෝටල් සහ විදේශිකයන් නිතර පැමිණෙන ස්ථාන ආශ්‍රිතව ඇති වෙළදසැල් වලද රැකියා අවස්ථා විදේශ සිසුන්ට ලැබෙන අවස්ථාද ඇත.

සැලකිලිමත් වියයුතු කරුණු

මෙහිදී විශේෂයෙන්ම කිව යුතු දෙයක්නම් ජපානයේ අර්ධ කාලීන රැකියා සොයා ගැනීම එතරම් අපහසු නොවුනත් සම්මුඛ පරීක්ෂණයකට මුහුණදීමට තරම් වූ සරල ජපන් කතා කිරීමට හැකියාව තිබීම රැකියාවක් සොයා ගැනීම පහසු කරන පහසුම මග යන්නයි.එමෙන්ම සදහන් කල යුතු දෙයක්නම් ජපන් ජාතිකයන් සමග රැකියා කිරීමේදී වෙලාවට පැමිණීම අනිර්වයෙන්ම සැලකිලිමත් විය යුතුය.එමෙන්ම එහිදී භාවිතා කරන ආචාරවිදි පිළිබදවද සැලකිලිමත් විය යුතුය. විශේෂයෙන්ම රැකියාව කරන අතරතුර හදිසි අවස්ථාවකදී හැරෙන්න දුරකථනය භවිතා නොකිරීමට වගබලා ගත යුතුය. මාසික වැටුප ලබා දෙන දිනය ආයතනයෙන් අයතනයට වෙනස් වන අතර එය මාසයේ දෙවැනි සතියේ හෝ අවසන් සතියේ විය හැකිය.